السكري / diabetes

السكري / diabetes سكر الدم، طريقة القياس والأنواع والأعراض والحد من خطورته، مع ذكر بعض الأرقام المهمة جدا السكري " أنا تمام التمام وما باكل حلو كثير .... " هالحلو الغدّار يلي لازم تدير بالك منّو! روق حالك شوي، وتعال نقيس ونشوف! كتير مننا بس تقلو "افحص سكري"، بيمط شفايفو وبيقول: "يا زلمة أنا مثل الحصان، ومو حاسس بشي، أصلاً ما بحب الحلو!".. يا عزيزي السكري بيتدخل على الساكت مثل "الحرامي السلّال"، بلا إحم ولا دستور، وبيقعد وبيتربع وأنت نازل بالهريسة وحلاوة الجبن والعوامة ورايق ومبسوط ومو حاس بشي، وببلش هو يتسلى على الشرايين، والأعصاب، والعيون على مهله. فحص السكري بشكل دائم مو وسواس، هاذ كشف مستعجل لتعرف شو عم يصير بجسمك، قبل ما هالحلو يقرر يقلب العشرة بينك وبينه ويصدمك بالواقع! 🩺 قبل ما تشك هالشكة... روق وخلي تحليلك يطلع صادق! التحليل المنزلي بجهاز الوخز بدو أصول، مو تكون ماكل صحن قطايف وتجي تقيس وتقول "يا لطيف السكري عندي طار"! ليكون جهازك صادق معك، اتبع هالخطوات: ✅️ غسيل الإيدين إجباري: غسل بمي وصابون ونشفهم قبل تقيس وإياك ثم إياك تقيس وإيدك عليها أثر عصير أو دبس تمر🙂، لأن الجهاز رح يقرأ السكر يلي على جلدك ويعطيك رقم يجلطك!😵‍💫 ✅ ️السكري الصيامي (Fasting): هاد بدو ركادة، يعني تكون صايم من 8 لـ 10 ساعات (بس المي مسموحة طبعاً)، وأول ما تفيق من النوم بتفحص. ✅ ️السكري بعد الأكل بساعتين (Postprandial): الحسبة بتبلش من أول لقمة بتنزل عالمعدة، مو بعد ما تخلص أكل وتقوم تغسل! وراقب الساعة تماماً بعد ساعتين. 🩸 طريقة استخدام الجهاز.. شكة ومسحة ! الموضوع بسيط بس حط الإبرة بقلم الوخز وعيّر مقاس الشكة (رقم 3 أو 4 بيكفي)، وحط الشريحة بمكانها بالجهاز ليشتغل،" لاتنسى تغسل إيدك مثل ما اتفقنا " شك طرف إصبعك من الجنب (مو من النص لأنو الجنب أقل وجع)، واكبس على إصبعك ضغطة صغيرة لتطلع نقطة دم محرزة، وقرّب طرف الشريحة عليها لتسحبها. خمس ثواني وبيعطيك الصافي! 📟 كيف منقرأ الأرقام؟ الشاشات شو عم تقول؟ بتحليل السكر المنزلي، في عنا قراءتين أساسيتين هني يلي بيكشفوا الطابق: السكر الصيامي: بيعطيك فكرة عن وضع جسمك وهو مرتاح ومو آكل شي بنوب. السكر بعد الأكل بساعتين: بيورجيك كيف جسمك والبنكرياس عم يتعاملوا مع الأكل والنشويات بعد اللقمة الهنية. 📊 زبدة الأرقام.. أنت بأي حارة؟ القصة بثلاث كلمات: ✅️طبيعي: 1. القياس الصيامي: بعد صيام [ 8-10ساعات] النتيجة تحت 100. 2. القياس بعد الأكل: [ بعد ما تبدأ أكل بساعتين ] النتيجة تحت 140. ◀️قبل السكري: ●القياس الصيامي: النتيجة 100-120. ●قياس بعد الأكل: النتيجة 140-199. 🔴مصاب بالسكري: ●القياس صيامي: النتيجة 126 وفوق. ●قياس بعد الأكل: النتيجة 200 وفوق. ⚠️⚠️️ تنبيه بالخط العريض: إذا طلعت النتيجة ضمن نطاق "ما قبل السكري"، لا تقعد تلطم! هالمرحلة هي "فرصة ذهبية" وكارت أصفر من جسمك بيقولك: "شيل يدك عن صحن المشبك، وعدل أكلك، لترجع الأمور طبيعية قبل ما نوقع بالفخ". ⛓️‍💥نوعين من السكري ... شو الفرق بيناتهم🤔؟ ●الأول (غالباً بيجي للأطفال🧒 والشباب🧏🏻‍♂️): هون البنكرياس بكون أعلن إفلاسو تماماً ووقف إنتاج الإنسولين، والعلاج هون بكون بالإنسولين من أول يوم بقرار من الطبيب. ●النوع الثاني (تبع الكبار🧓🏻 والوراثة): البنكرياس شغال وعم ينتج، بس الجسم عم يعاند ومو طايق الإنسولين (مقاومة إنسولين)، وهاد بكون سببه الوزن الزائد، قلة الحركة، والأكل اللطيف يلي كلو مقالي ومعجنات. 🚨 لما تبلش الدراما الحقيقية.. (الهبوط و الارتفاع!) 📉 1. هبوط السكر (الوحش المرعب السريع): إذا نزل السكر تحت الـ 70 mg/dL، هون الجسم ببلش يرجف. ■الأعراض: رجفة بالإيدين، عرق بارد بغرق الثياب، جوع، دقات قلب سريعة، ودوخة. ■الإسعاف السريع: طبق قاعدة (15/15) فوراً اعطيه نص كاسة عصير طبيعي أو 3 معالق سكر بمي، واستنى 15 دقيقة وقيس السكر، إذا لسا نازل، كرر العملية. (لا تقرب على كيك وشوكولا، لأن الدهون بتأخر امتصاص السكر!). 📈 2. الارتفاع الشديد (الخبيث المتمهل): إذا طار السكر للأرقام العالية (فوق الـ 250 mg/dL). ■الأعراض: عطش ناشف ما بيرتوي، فوتة الحمام كل دقيقتين، تعب مهدود الحيل، وريحة التم بتصير متل "التفاح المعفن" أو الأسيتون. ■الإسعاف: هاد لازم تشرب مي كثير ، وجرعة تصحيحية من الإنسولين (إذا كان مريض سكري وعنده خطة علاجية)، وإذا الأمور ساءت... فوراً عالمشفى ... ❤️ دقيقة وحدة كل يوم ... بتخليك بكرا "سلطان زمانك" السكري ضيف ثقيل، بس إذا احترمته وحسبتله حساب، بيمش الحيط الحيط وبيصير صديقك وما بيأذيك. دير بالك على صحتك، خفف هالنقرشة والنمنمة طول الليل، وخلي مشيك روتيني يومي، ليبقى جسمك عم يشتغل متل الساعة بنغم ورواق وصحة وعافية! سوريا 🇸🇾 فيها اكثر من 2.2 مليون مصاب بالسكري، شافاهم الله وعافاهم "درهم وقاية خير من قنطار علاج"